عرض مشاركة واحدة
قديم 03-15-2008, 08:22 PM   المشاركة رقم: 1
الكاتب
kazanova
عضو مشارك متميز ***
المعلومات  
التسجيل: Feb 2007
العضوية: 45
المشاركات: 127
بمعدل : 0.03 يوميا
الإتصال kazanova غير متواجد حالياً


المنتدى : مواقف محرجة و كوميدية
Smile خروف العيــــــــــــــــــــــد


شاركنا الموضوع من فضلك لنشر الفائدة، واضغط مشاركة بالأسفل
Like

خروف العيــــــــــــــــــــــد


امبارح ابويا صاحى من النوم المغربية كدة بعد ماكان اتغدى وانتخ ودخل نام لقانى فاتح الكمبيوتر ومشغل اغنية ايظن بتاعة بعرور ومى والصوت قد كدة ...
الصوت من داخل الغرفة : آه يانارى آه يانارى .. اصله مولع نارى !!
ابويا بيخبطلى على الباب ( تقريبا كان بيهبد مش بيخبط ) : انت ياحيوان ياللى جوًا .. !

انا زى الكومسارية بالظبط : ايووووووووووووووووا
ابويا : وطى الزفت اللى انت مشغله ده وافتح الباب
انا بعد مافتحت : ايوة يا دادى !
ابويا : ايه اغانى المبولة اللى انت بتسمعها دى !

انا : معلش بقى ياحاج .. آخر موضة
ابويا : قصره .. البس هدومك وتعالى معايا عشان نروح نجيب الخروف ونحطه فى المنور بتاع بيت عمك
انا : خروف ايه يابابا .. مش كفاية اللى حصل السنة اللى فاتت .. انت لسه ماحرمتش !!
ابويا : ورايا !

نزلت مع ابويا واشترى الخروف من عند واحد معرفة وقالى اتفضل يلا وديه بيت عمك
انا : وانا هامشى بيه لوحدى فى الشارع كدة ؟؟
ابويا : ايه ياخويا بتخاف من الخرفان ولا ايه .. ماتخافش مابيعضش يا اهطل انت ..!!
انا : اولا ماتهزقنيش قدام الراجل .. ثانيا مش نظرية خايف .. المسألة مسألة منظر .. هامشى فى الشارع بخروف .. ولو حد يعرفنى شافنى يبقى منظرى ايه ؟؟

الجزار بعد ما أكتشفت انه كان راشق معانا فى الحوار : خلاص يابيه خد معاك نبوية تمشى بيه جنبك وتوصلهولك مكان مانت عايز .. خدى يابت يانبوية روحى مع البيه بالخروف ده لحد بيت الاستاذ ( سيد كاورك ) عمه وتعاليلى تانى عشان عايزك ماتروحيش ..

*******************************
مشينا فى الشارع انا ونبوية والخروف
انا : ابعدى البتاع ده بعيد عنى
نبوية : انت بتخاف منهم ولا ايه يابيه ؟؟
انا : فشر .. انا بس خايف على البنطلون يتوسخ عشان لونه فاتح بس !!
شوية والخروف قرب منى .. اترعبت رحت ظرفه شلوت جه فى ايد نبوية .. راحت سايبه الخروف عشان تشوف ايدها .. وهوب الخروف جرى ... وبيجرى ولا كأنه عايز يحقق ميدالية !
انا : اجـــــــرى يانبوية ... وراه !!
نبوية حطت الجلابيه فى بقها وطيران ورا الخروف

وانا بقى : امسك الخروف ده ياكابتن .. ياكابتن .. ماشى ياكابتن !! .. انت يالا ياصغير امسك الخروف ده امسكه ايوا ده .. لقيت الواد طالع يجرى جنب الخروف عشان يركب عليه !!!!!!!
وفعلا لحقه وركب عليه وهوب الواد اتقلب من على الخروف .. ماعلينا .. الخروف تعب تقريبا ووقف لوحدة .. راح واحد من الناس اللى كانوا بيجروا معانا ورا الخروف _ مانا لميت الشارع كله وراه _ خبط فى الخروف لما وقف فجأة لانه كان جاى من ورا بسرعة .. وهوب اتقلب هو كمان !!!
ماعلينا مسكت نبوية الخروف وقالتلى انا مش قادرة امشى انا تعبت شوفلنا تاكسى يوصلنا يا أستاذ
انا : ومالك قرفانة وانتى بتكلمينى كدة ليه .. هو انا اللى كنت ماسكه وسيبته يجرى ... !!
نبوية : خلاص وقفلنا تاكسى بقى بدل ما اسيبهولك فى الشارع وارجع .. !
انا : انتى بتهددينى .. تاكســــــــــى !!

********************************
ركبنا التاكسى وكانت قمة الكوميديا
انا قدام ونبوية ورا على الشمال والخروف على اليمين يعنى قاعد ورايا ...
وطول السكة وانا عمال اتنطط على الكرسى بسبب الخروف اللى حاطط بقه فى افايا ده .. وشوية اطلع دماغى من الشباك يروح الخروف مطلعلى دماغه هو كمان من الشباك اللى ورا ( شكله بيفهم ! ) طبعا وسط ضحكات وتريقة من الناس اللى شايفنا فى الشارع ولا كأنهم بيتفرجوا على المسرح المتنقل !!
وصلنا بيت عمى والحمد لله واذا بى افاجأ انه مش موجود وانى مطالب انى استنى مع الخروف العبقرى ده فى البوابة لحد ماعمى ييجى .. وطبعا نبوية اول ما وصلنا كسرت ورايا قله ومشيت !!

طبعا انا واقف بيه فى البوابة مش عارف اعمل معاه ايه .. خصوصا انه كان بيبصلى نظرات عجيبه كدة .. غالبا فيما معناه انه عايز ينطحنى .. طبعا ماكدبتش خبر .. رحت فاتح البوابة وطلعت وقفلتها ورايا بالقفل اللى ابويا كان سايبهولى وقعدت اراقبه من برة !
لحد ماعمى جه ..

انا : استلم الخروف اهه ..
عمى : استنى انت رايح فين .. ابوك اتصل بيا وبيقولى خلى هانى يرجع بالخروف عشان حصل لخبطة والجزار اداكوا الخروف بتاع زبون تانى .. !!
انا : .............
عمى : ولا .. انت ياض .. حد يتصل بالاسعاف !!


إنضم معنا على الجروب الخاص بنا على الفيس بوك :

https://www.facebook.com/groups/egy4tec2/

والصفحة الخاصة بالشركة المصرية للهندسة والتكنولوجيا على فيسبوك هي :

https://www.facebook.com/egy4tec

يبدأ التدريب على الصيانة والهاردوير في المواعيد التالية :

http://www.egy4tec.com/forums/showthread.php?t=5994

محتويات كورسات الصيانة والهاردوير بالمصرية للهندسة والتكنولوجيا egy4tec:

http://www.egy4tec.com/center/lesson-1239-1.html











عرض البوم صور kazanova   رد مع اقتباس